सार्वजनिक सुनुवाइमा सहभागी स्थानीयले कृषि, पर्यटन र पूर्वाधार क्षेत्रको विकासमा चासो

भक्तपुर, १३ जेठ । भौगोलिक रूपमा भक्तपुरको सबैभन्दा ठूलो वडाका रूपमा रहेको चाँगुनारायण नगरपालिका–५ ले सीमित स्रोत साधनको बाबजुत सर्वसुलभ सेवा प्रवाह, गुणस्तरीय स्वास्थ्य र शिक्षा तथा दिगो भौतिक पूर्वाधार विकासमा फड्को मारेको दाबी गरेको छ ।

राष्ट्रिय सञ्चार केन्द्रको आयोजनामा आज छालिङस्थित ५ नं वडा कार्यालयमा आयोजित सार्वजनिक सुनुवाइ तथा प्रगति समीक्षामा नगर गौरवका आयोजनाका रूपमा ‘फास्ट ट्र्याक’ सडक निर्माण, ग्रामीण भेकमा फराकिला सडकको सीमाङ्कन, विपद् जोखिम न्यूनीकरण तथा व्यवस्थापन, पर्यटन प्रवर्द्धन, कृषिको आधुनिकीकरणलगायत क्षेत्रमा जनअपेक्षाअनुसार कार्यसम्पादन गरिएको जानकारी दिइयो ।
चाँगुनारायण नगरपालिका–५ का वडाध्यक्ष जयन्द्र खड्काले साँधुरा गोरेटो बाटो र सडकको सीमाङ्कन र स्तरोन्नति, नगर गौरव आयोजनाको कार्यान्वयन, सर्वसुलभ सेवा प्रवाह, सार्वजनिक यातायात र सडक पूर्वाधार निर्माणमा वडावासीले महसुस गर्नेगरी परिवर्तन ल्याइएको दाबी गर्नुभयो ।
चालु आर्थिक वर्षमा वडावासीलाई स्वच्छ पिउने पानीको पहुँच पुर्‍याउन रु एक करोड २४ लाखको लगतमा छालिङ बृहत् खानेपानी आयोजनाको ठेक्का लगाइएको छ । नगरोन्मुख भूभाग बढी रहेको सो क्षेत्रमा ११ वटा डिप बोरिङ सम्पन्न गरी घरघरमा पिउने पानीको सुविधा पुर्‍याइएको छ ।
कमलविनायक–नगरकोट, तेलकोट–गोरखनाथ, खरिपाटी–मनकामना, सैनिक शिक्षालय–वडा कार्यालय हुँदै मच्छेनारायण सडक १२ मिटर फराकिलो स्तरोन्नति गरी कालोपत्र गर्ने तयारीमा रहेको उक्त कार्यक्रममा जानकारी दिइयो । पछिल्लो दुई कार्यकाल वडाको नेतृत्व गर्नुभएका वडाध्यक्ष खड्का जनताको विश्वास टुट्न नदिने गरी वडावासीको सल्लाह र सुझावमा नै विकास र सुशासनको अभियान अगाडि बढाइएको जिकिर गर्नुहुन्छ ।
वडा कार्यालयले महिला उद्यमशीलता कार्यक्रममार्फत एकल महिला र महिलालाई आर्थिकोपार्जनका विभिन्न तालिम प्रदान गरेको छ । ज्येष्ठ नागरिकलाई एक्लोपन महसुस हुन नदिन मनोपरामर्श, बालमैत्री कार्यक्रममार्फत बालबालिकालाई चित्रकला तथा खेलकुद र युवालक्षित विभिन्न परियोजना सञ्चालन गरेको छ ।
कृषि, पर्यटन र पूर्वाधारमा स्थानीयको चासो
सार्वजनिक सुनुवाइमा सहभागी स्थानीयले कृषि, पर्यटन र पूर्वाधार क्षेत्रको विकासमा चासो राखेका थिए । सहरीकरणको प्रभाव न्यून रहेको छालिङको अधिकांश भूभाग कृषियोग्य छ ।
कार्यक्रममा वडावासीले रासायनिक मलको अभाव, विपद् व्यवस्थापनको तयारी, सडक स्तरोन्नति, सेवा प्रवाह, पूर्वाधार विकासका लागि बजेट वृद्धि, पिउने पानी, अपाङ्गमैत्री पूर्वाधार, रोजगारी सिर्जना, सीपयुक्त तालिमको व्यवस्था गर्न माग गरेका थिए ।
स्रोत र जनअपेक्षाको चेपुवामा जनप्रतिनिधि
राष्ट्रिय जनगणना २०७८ को तथ्याङ्कानुसार छालिङमा चार हजार ५५९ जना पुरुष र चार हजार ६९५ महिला गरी नौ हजार २५४ जनाको बसोबास छ । सो वडामा दुई हजार ९९७ घरधुरी रहेका छन् । साविकको छालिङ गाउँ विकास समितिका रूपमा रहेको सो वडा ९ दशमलव ६१ वर्गकिलोमिटर क्षेत्रमा फैलिएको छ ।
भौगोलिकरूपमा जिल्लाकै ठूलो सो वडामा ७२ किलोमिटर सडक सञ्जाल रहेको छ । वडाको बजेट जम्मा रु दुई करोड रहेको छ । सीमित स्रोतका कारण जनअपेक्षअनुसार काम गर्न नसकिएको जनप्रतिनिधिको गुनासो छ ।